С.А.Попов -Сэмэн Тумат 80 сааһын туолар үбүлүөйүн көрсө
Семен Андреевич Попов -Тумат саха норуодунай суруйааччыта, Саха Өрөспүүбүлүкэтин култууратын үтүөлээх үлэһитэ, П.А.Ойуунускай аатынан судаарыстыбаннай бириэмийэ лауреата, Булуҥ уонна Чурапчы улуустарын бочуоттаах гражданина, СӨ Ил Түмэнин А.П.Илларионов аатынан бириэмийэ лауреата, СӨ Н.Е.Мординов-Амма Аччыгыйа аатынан судаарыстыбаннай бириэмийэ лауреата- поэт, прозаик,тылбаасчыт,литературнай критик, журналист. Семен Андреевич төрөппүттэрэ Болтоҥоттон төрүттээхтэр. Андрей Фомич уонна Анна Никитична Поповтар,1938 сыллаахха таайдара Андрей Андреевич Новгородов отутус сыллардааҕы политическай репрессияҕа
түбэһэн ытыллыбытын кэннэ, Чурапчы Болтоҥотуттан Булун оройуонун Саҕастыыр бөһүөлэгэр көһөн тиийбиттэрэ. Андрей Фомич ахсаан учууталынан, Анна остуораһынан үлэлээбиттэрэ. Андрей Фомич лингвист Сэмэн Новгородов эдьиийиттэн Анна Андреевна Поповаттан төрөөбүт киһи
этэ. Семен Андреевич 1944 сыллаахха олунньу 23 күнүгэр төрөөбүтэ. 1965с.Чурапчы орто оскуолатын бүтэрбитэ, 1973с. ЯГУ филологическай факультетын бүтэрбитэ. П.А.Ойуунускай аатынан литературнай музейга үлэлээбитэ, » Эдэр коммунист», » Саҥа олох» хаһыаттарыгар корреспонденынан, » Маарыкчаан» телестудия5а кылаабынай үлэлээбитэ. 1996-2014 сылларга «Чолбон » сурунаал редактора. Сэмэн Тумат литература эйгэтигэр ма4най хоһоонунан киирбитэ. Бастакы«Таптал» диэн хоһооно 1965 сыллаахха «Эдэр коммунист» хаһыакка тахсар.
Өр сыллаах үлэтин түмэн «Эйгэ тардыыта» диэн хомуурунньугу таһаарбыта. Семен Андреевич кэпсээҥнэ холонуута кылгас новеллалартан саҕаламмыта. Оҕо сааһын ойуулуур «Муора арыытыгар олох» диэн 1986 сыллаахха тахсыбыт кинигэтэ улахан сэҥээриини ылан, оскуола учебниктарыгар киирбитэ. Салгыы «Туундара оһоҕо», «Улуу кыыл тыына», «Иэс төлөнүүтэ»,«Батыһыннарыылаах биэ» «Тоотук муоратааҕы сырыылара», «Оҕо сааһым хоптолоро», «Өс төрөөһүнэ», «Хотун Хаан», «Тойон Хаан» о.д.а. кинигэлэри утуу-субуу бэчээттэтэн, оҕо аймах тапталлаах суруйааччыта буолбута. Күн Дьирибинэ, Михаил Доҕордуурап, Алексей Бродников, Василий Яковлев, Далан, Эрчимэн, Архыып Абаҕыыныскай, Петр Аввакумов, Савва Тарасов, Күннүк Уурастыырап уо.д.а. айымньыларын хомуйан бэчээттэппитэ. 1999 сыллаахха Константин Туйаарыскай аатынан оҕо уус-уран айымньыларыгар ыытыллыбыт өрөспүүбүлүкэтээҕи сабыылаах литературнай куонкуруска
«Ньиэрпэни өрүһүйүү» кэпсээнин иһин маҥнайгы миэстэни ылбыта. 2014 сыллаахха Национальнай библиотека Семен Андреевич Попов-СэмэнТумат олоҕун уонна айар улэтин тумэр биобиблиографическай ыйынньыгы таһаарбыта.